Նորություններ

15.09.2020

Երևանում ևս մեկ հիմնանորոգված դպրոց բացվեց

Երևանի Ռաֆայել Իշխանյանի անվան հ.153 հիմնական դպրոցը հիմնանորոգումից հետո դռները բացեց սաների առջև: Վերակառուցված կրթօջախում սովորում է շուրջ 700 աշակերտ, սակայն պայմաններն այսօր արդեն հնարավորություն են տալիս, որ այն ընդունի մինչև 950 երեխայի։ Դպրոցի բացման հանդիսավոր արարողությանը ներկա են գտնվել ՀՀ վարչապետ Նիկոլ Փաշինյանը, Երևանի քաղաքապետ Հայկ Մարությանը, կրթության, գիտության, մշակույթի և սպորտի նախարար Արայիկ Հարությունյանը, տարածքային կառավարման և ենթակառուցվածքների նախարար Սուրեն Պապիկյանը, Երևանի ավագանու անդամներ, հյուրեր: 
Եռահարկ դպրոցը հարմարեցված է նաև հենաշարժողական խնդիրներ ունեցող երեխաների համար. կառուցվել են թեքահարթակներ, տեղադրվել է վերելակ, հարմարեցվել են նաև սանհանգույցները: Նոր, լուսավոր ու հարմարավետ պայմաններ են ստեղծվել դասասենյակներում, մարզադահլիճում ու հանդիսությունների դահլիճում, գրադարանում: Հիմնանորոգման ընթացքում տանիքին տեղադրվել է արևային էներգիայի համակարգ, որն ապահովելու է դպրոցի տաք ջուրը: Կրթօջախի բակում էլ կառուցվել է նոր խաղադաշտ:
Դպրոցը հիմնովին վերակառուցվել է ՀՀ կառավարության և Ասիական զարգացման բանկի միջև իրականացվող դպրոցների սեյսմիկ անվտանգության բարելավման ծրագրով: Վերակառուցման ընդհանուր բյուջեն կազմել է 1,3 մլրդ դրամ, աշխատանքներն սկսվել էին 2016թ. աշնանը: 

 

14.09.2020

Նոր ուսումնական տարին՝ նոր պայմաններով

Քանի դեռ կորոնավիրուսային հիվանդությունն ամբողջությամբ չի նահանջել` նոր ուսումնական տարում դպրոցներն ու մանկապարտեզները կգործեն հատուկ կանոններով: Առաջին դասարանցի, թե բարձր. բոլորը դպրոց պետք է գան դիմակով: 

Դպրոցների բակերում և մուտքի մոտ գծանշումը երեխաներին կօգնի պահպանել պատշաճ հեռավորություն:

Դպրոցներն այս տարի կգործեն 6-օրյա: 20-ից ավելի աշակերտ ունեցող դասարանները կկիսվեն: Ամեն սեղանի մոտ կնստի 1 աշակերտ:

Դասերի ժամանակ ու դպրոցում աշակերտները, ուսուցիչներն ու անձնակազմի մյուս անդամները կլինեն դիմակով: Դպրոցականներն իրենց հետ պետք է ունենան նաև լրացուցիչ դիմակ՝ 3-4 ժամը մեկ փոխելու համար: Եթե հանկարծ մոռացած կամ վնասած լինեն դիմակը՝ դպրոցը կտրամադրվի. պետությունն ու համայնքն արդեն հոգացել են դրանց առկայությունը:
Ամեն հերթափոխից առաջ բոլոր դասասենյակները կախտահանվեն և կօդափոխվեն: Բուֆետներն ու ճաշարանները չեն գործի: Աշակերտները գրատախտակին չեն մոտենա, դասամիջոցները կանցկացնեն դասասենյակներում, անհրաժեշտության դեպքում դուրս կգան հերթով: Միջանցքներում ևս կսահմանվի հսկողություն:


28.08.2020

Դպրոցների ուսուցիչներն ուսումնական տարվան ընդառաջ կթեստավորվեն

Նոր ուսումնական տարում դպրոցներում համավարակի հնարավոր ներթափանցումը կանխելու նպատակով Երևանի քաղաքապետարանն առողջապահության նախարարության հետ կձեռնարկի անհրաժեշտ միջոցներ: Թեմայի շուրջ քաղաքապետարանում հրավիրվել է հատուկ խորհրդակցություն՝ Երևանի պոլիկլինիկաների ղեկավարների մասնակցությամբ:

Մինչև ուսումնական տարվա սկիզբը բոլոր ուսուցիչները պարտադիր կթեստավորվեն: Այդպես կբացառվի այդ պահին վարակված աշխատակիցների մուտքը դպրոց: Որտեղ և ինչպես՝ լրացուցիչ կտեղեկացվի: Քննարկվում է նաև հետագա թեստավորման խնդիրը:
Դպրոցների բուժկետերը կապահովվեն անհրաժեշտ դեղորայքով, բուժքույրերն էլ կվերապատրաստվեն և կաշխատեն փոփոխված ժամանակացույցով:
Երևանի քաղաքապետարանի առողջապահության վարչության պետ Կամսար Բաբինյանն ընդգծել է, որ նախապատրաստական աշխատանքները պետք է կազմակերպվեն հնարավորինս սեղմ ժամկետներում:

05.10.2019

Ուսուցչի օրը. Երևան քաղաքի տարվա լավագույն տնօրենը, մանկավարժը և դաստիարակը

Ուսուցչի օրվան նվիրված տոնական միջոցառման ընթացքում հայտնի են դարձել Երևանի տարվա լավագույն տնօրենը, ուսուցիչն ու դաստիարակը: 2019-2020 ուսումնական տարվա արդյունքներով «Երևան քաղաքի տարվա լավագույն տնօրեն» անվանակարգում մրցանակի է արժանացել Երևանի հ.181 հիմնական դպրոցի տնօրեն Լիլիթ Արեյանը, «Երևան քաղաքի տարվա լավագույն ուսուցիչ» անվանակարգում՝ հ.186 հիմնական դպրոցի կենսաբանության ուսուցիչ Գայանե Բուլդոյանը, իսկ «Երևան քաղաքի տարվա լավագույն դաստիարակ» անվանակարգում էլ՝ հ.33 մանկապարտեզի դաստիարակ Աննման Մելքոնյանը:

Ուսուցչի օրվա առթիվ, կրթության բնագավառում ներդրած նշանակալի ավանդի և ակնառու հաջողությունների համար, ոլորտի մի շարք աշխատակիցներ էլ պարգևատրվել են Երևանի քաղաքապետի պատվոգրերով: Պարգևները մանկավարժներին են հանձնել քաղաքապետարանի հանրակրթության վարչության պետն ու Երևանի ավագանու անդամները:
Հրաչյա Ղափլանյանի անվան դրամատիկական թատրոնում կազմակերպված տոնական միջոցառումն ամփոփվել է թատերական ներկայացմամբ:

02.10.2019

Երևանի հ. 200 դպրոցն արդեն Լեոնիդ Ազգալդյանի անվան է

Դավթաշեն վարչական շրջանում գտնվող հ. 200 հիմնական դպրոցն այս տարվա հուլիսին Երևանի քաղաքապետի որոշմամբ անվանակոչվեց ԼՂՀ և ՀՀ «Մարտական խաչ» առաջին աստիճանի շքանշանակիր, Արցախի հերոս Լեոնիդ Ազգալդյանի անունով: 

Այսօրվանից արդեն այդ մասին կհուշի նաև դպրոցի ցուցատախտակը, որի բացման պատիվը վերապահվել է Լեոնիդ Ազգալդյանի քրոջը՝ Նելլի Ազգալդյանին: Դպրոցի անվանակոչման առաջարկը Երևանի ավագանու անդամ Լևոն Զաքարյանինն է եղել:
Կրթօջախի սաների մասնակցությամբ հերոսի հիշատակին նվիրված միջոցառմանը ներկա են գտնվել Երևանի քաղաքապետի տեղակալ Տիգրան Վիրաբյանը, ԱԺ պատգամավորներ, Երևանի ավագանու անդամներ, Դավթաշեն վարչական շրջանի ղեկավարը, քաղաքապետարանի աշխատակազմի անդամներ, Ազգալդյանի մարտական ընկերներն ու հարազատները: Դպրոցում այժմ սովորում է ավելի քան 1300 աշակերտ:

02.09.2019

Նոր ուսումնական տարին` դպրոցներում

Սեպտեմբերի 1-ից նոր ուսումնական տարի է: Երևանի հիմնական և միջնակարգ դպրոցներ է հաճախում շուրջ 98500 աշակերտ, որից 11860-ը՝ առաջին դասարանցիներն են:

Համայնքային դպրոցներում սպասվում են մի շարք նախաձեռնություններ: Արդեն սեպտեմբերից կրթօջախները կտեսակավորեն աղբը և առաջին հերթին կառանձնացնեն թուղթը: 

Այս տարի աշակերտական պայուսակներն ավելի թեթև են: Մի շարք առարկաների դասագրքեր բաժանված են երկու մասի, իսկ 1-4-րդ դասարանցիների դասագրքերն անվճար են: 
Ուսումնական տարին աշակերտներին խոստանում է լինել ավելի հետաքրքիր: Կհիմնվեն աշակերտական ակումբներ՝ գրական, բնապահպանական, նաև՝ մասնագիտական կողմնորոշման: Առաջին անգամ դպրոցների միջև կանցկացվի «Սթարթափ սամիթ Երևանը»: